Lidhja Demokratike e Kosovës  Dega IV Prishtinë

 

 Statuti i Lidhjes Demokratike të Kosovës

 

                      

IV. ORGANIZIMI I LDK-së

A. Kuvendi i LDK-së

Neni 17

Kuvendi është organi më i lartë i LDK-së.

Kuvendi i LDK-së:

• miraton, ndryshon dhe plotëson Programin dhe Statutin e LDK-së;
• përcakton orientimet themelore të veprimit politik të LDK-së;
• nxjerrë rezoluta, deklarata dhe merr vendime;
• zgjedhë Kryetarin e LDK-së;
• zgjedhë Këshillin e Përgjithshëm të LDK-së;
• shqyrton dhe vlerëson punën e organeve qendrore të LDK-së dhe të organeve të tjera të     LDK-së;
• vendosë për format e bashkëpunimit me partitë e tjera politike dhe me asociacionet ndërkombëtare;
• zgjedhë Komisionin Statutar;
• kryen edhe punë të tjera në pajtim me Programin dhe me Statutin e LDK-së.

Në kushte të gjendjes së jashtëzakonshme, kur Kuvendi nuk mund të tubohet dhe ta ushtrojë normalisht veprimtarinë e vet, kompetencat e tij i merr Këshilli i Përgjithshëm, Kryesia e LDK-së ose kryetari.

Neni 18

Kuvendin e LDK-së e përbëjnë 355 delegatët e zgjedhur në kuvendet e degëve.

Për numrin dhe kriteret e zgjedhjes së delegatëve vendosë Këshilli i Përgjithshëm, përkatësisht Kryesia e LDK-së, në bazë të autorizimit të Këshillit të Përgjithshëm.

Në punën e Kuvendit marrin pjesë edhe anëtarët aktual të Kryesisë dhe të Këshillit të Përgjithshëm të LDK-së, por pa të drejtë vote, nëse nuk janë të zgjedhur delegatë të Kuvendit përkatës.
 

Neni 19

Kuvendi i rregullt zgjedhor i LDK-së mbahet një herë në 4(katër) vjet.  

Me të njëjtën përbërje Kuvendi mund të mbajë mbledhje pune së paku një herë në dy vjet.

Kuvendin e LDK-së e konvokon Kryetari i LDK-së ose Këshilli i Përgjithshëm.

Kryetari, përkatësisht Këshilli i Përgjithshëm, e propozon rendin e ditës së Kuvendit.

Punën e Kuvendit të LDK-së e drejton Kryetari i LDK-së dhe Kryesia e punës e cila zgjedhet në      Kuvend.

Me rregullore të veçantë, të cilën e miraton Kuvendi, përcaktohet më hollësisht mënyra e   punës së Kuvendit.

Neni 20

Kuvendi i LDK-së konvokohet edhe atëherë kur këtë e kërkon 1/3 e delegatëve që e përbëjnë Kuvendin ose 1/3 e kuvendeve të degëve të LDK-së.

Kuvendi i LDK-së, i konvokuar sipas alinesë paraprake, duhet të mbahet në afatin prej 60 ditësh nga dita kur është shtruar kërkesa.   

Neni 21

Vendimet e Kuvendit dhe të Këshillit të Përgjithshëm të LDK-së janë të plotëfuqishme në     qoftë se në mbledhje marrin pjesë më tepër se gjysma e anëtarëve të cilët e përbëjnë organin përkatës dhe nëse për to votojnë shumica e të pranishmëve.

Vendimet në Kuvend merren me votim të hapët.

Neni 22  

Zgjedhja e organeve të LDK-së bëhet me votim të fshehtë.

 

B. Këshilli i Përgjithshëm

Neni 23

Këshilli i Përgjithshëm i LDK-së:

• propozon projektin e Programit dhe të Statutit të LDK-së, si dhe plotësimet dhe ndryshimet e tyre;
• përcakton qëndrimet dhe orientimet kryesore politike të LDK-së dhe të organeve të saj;
• kujdeset për realizimin e vendimeve të Kuvendit të LDK-së;
• zgjedhë dhe shkarkon anëtarët e Kryesisë, nënkryetarët dhe sekretarin e përgjithshëm të LDK-së;
• zgjedhë dhe emëron sektorët, këshillat dhe trupat e tjerë punuese dhe i përcakton detyrat konkrete të tyre;
• zgjedhë dhe emëron kryeredaktorin dhe këshillin redaktues të organit të LDK-së dhe të publikimeve të tjera të LDK-së;
• emëron udhëheqësin e Organit administrativ të LDK-së – të QIK-ut (Qendrës për Informim të Kosovës)
• në bazë të propozimit iniciativ të degëve të LDK-së, përcakton listen përfundimtare të kandidatëve të LDK-së për deputetë në Kuvendin e Kosovës, si dhe jep iniciativën për revokimin e tyre;
• propozon kryetarin e Grupit parlamentar;
• në bazë të propozimit të Kryesisë, merr qëndrime edhe për zgjedhje të tjera kuadrosh në organet e pushtetit;
• përcjellë realizimin e politikës së LDK-së nga ana e përfaqësuesve të saj në Kuvendin e Kosovës dhe në organet e tjera të pushtetit;
• merr vendim për shpalljen e zgjedhjeve në LDK;
• shqyrton dhe miraton Raportin mbi punën e Kryesisë së LDK-së;
• miraton Planin financiar të LDK-së dhe Llogarinë përfundimtare;
• i paraqet Kuvendit Raportin mbi punën e vet.

Neni 24

Këshillin e Përgjithshëm e përbëjnë 107 (njëqindeshtatë) anëtarë.

Në Kuvendin e LDK-së zgjedhën 103 (njëqindetre) anëtarë të Këshillit të Përgjithshëm.

Komisioni Kandidues i LDK-së, në konsultim me Kryesinë e LDK-së e bën propozimin e listës iniciale për përbërjen e Këshillit të Përgjithshëm, me numër të kandidatëve aq sa është përbërja e Këshillit të Përgjithshëm, 107 (njëqindeshtatë).

Lista e inicuar nga Komisioni Kandidues, në konsultim me Kryesinë e LDK-së, mund të plotësohet edhe me kandidatë të tjerë nga ana e Kuvendit, por jo më shumë se 1/3 e numrit të përgjithshëm.

Në përbërjen e Këshillit të Përgjithshëm të LDK-së, me të drejta të barabarta, hyjnë Kryetari i LDK-së, Kryetarja e Forumit të Gruas, Kryetari i Forumit të Rinisë si dhe Kryetari i Kolegjiumit të degëve në diasporë.

Anëtarët e Këshillit të Përgjithshëm mund të rizgjedhen.

 

C. K r y e t a r i

Neni 25

Kryetari i LDK-së:

• e përfaqëson LDK-në;
• e udhëheqë punën e LDK-së dhe të organeve të saj;
• merr vendim për konvokimin e mbledhjeve të Kuvendit të LDK-së;
• konvokon mbledhjen e Këshillit të Përgjithshëm dhe të Kryesisë së LDK-së;
• merr vendime dhe qëndrime politike në pajtim me Programin dhe me Statutin e LDK-së;
• jep iniciativa për zgjedhje kuadrash;
• u jep autorizime personave të tjerë për përfaqësimin e LDK-së, si dhe, në bazë të       propozimit të Kryesisë, cakton përbërjen e delegacioneve të LDK-së.

Neni 26

Kryetari i LDK-së zgjedhet në Kuvendin e LDK-së.

Kryetari i Lidhjes Demokratike të Kosovës zgjedhet me votim të fshehtë, me më shumë  kandidatë.

Kryetari i Lidhjes Demokratike të Kosovës njëkohësisht është kryetar i Këshillit të Përgjithshëm, përkatësisht kryetar i Kryesisë së LDK-së. 

 

Ç. K r y e s i a

Neni 27

Kryesia është organ politiko-ekzekutiv i Këshillit të Përgjithshëm të LDK-së.

Kryesia  përbëhet prej 23 anëtarëve dhe atë e përbëjnë:

• Kryetari,
• pesë nënkryetarë,
• Sekretari i përgjithshëm dhe
• 14 anëtarë të tjerë.

Kryetarja e Forumit të Gruas dhe Kryetari i Forumit të Rinisë janë anëtarë të Kryesisë me të drejta të barabarta.

Neni 28

Kryesinë e zgjedh Këshilli i Përgjithshëm i LDK-së.

Zgjedhja e anëtarëve të Kryesisë bëhet sipas procedurës së përcaktuar me dispozitat e nenit 22 të këtij Statuti.

Në bazë të propozimit të Kryetarit të LDK-së, Këshilli i Përgjithshëm, nga radhët e anëtarëve të Kryesisë, zgjedhë pesë nënkryetarët dhe Sekretarin e përgjithshëm të LDK-së.

(Këshilli i Përgjithshëm mund ta zgjerojë listen e kandidatëve për Kryesinë e LDK-së me propozime edhe deri në 1/3 e përbërjes së saj).

Neni 29

Anëtari i Kryesisë mund të rizgjedhet.

Në qoftë se ndonjëri nga anëtarët e Kryesisë nuk është në gjendje ta kryej detyrën e    anëtarit, Kryesia është e detyruar që të kërkojë nga Këshilli i Përgjithshëm të bëjë shkarkimin e tij dhe të zgjedhë anëtar tjetër të Kryesisë.

Këshilli i Përgjithshëm i LDK-së, në bazë të kompetencave nga neni 23 dhe 24 i këtij Statuti, mund ta bëjë shkarkimin e anëtarit të Kryesisë apo të Kryesisë në tërësi, po që se konstaton se puna dhe veprimet e tyre janë në kundërshtim me Programin dhe me Statutin e LDK-së.

Neni 30

Kryesia e LDK-së:

• e përfaqëson LDK-në;
• në emër të LDK-së merr vendime politike dhe vendime të tjera, po që se ato nuk janë në   kompetencë të organeve tjera të LDK-së;
• kujdeset për zbatimin e vendimeve të veta dhe të vendimeve dhe të qëndrimeve të    Kuvendit, të Këshillit të Përgjithshëm dhe të Kryetarit të LDK-së;
• kujdeset për harmonizimin e punëve të degëve, të nëndegëve dhe të aktiveve të LDK-së, përcjellë realizimin e vendimeve të organeve të LDK-së dhe merr vendime konkrete lidhur me organizimin dhe funksionimin e tyre;
• Kryesia rregullisht analizon dhe përcjellë punën e çdo sektori të Kryesisë dhe për moskryerjen e punëve, inicon përgjegjësinë e tyre;
• në raste të veçanta Kryesia pezullon punën e Kryesisë së Degës, të Nëndegës ose të Aktivit, si dhe konvokon Kuvendin e Degës, të Nëndegës ose të Aktivit. Lidhur me vendimin e tillë Kryesia e njofton Këshillin e Përgjithshëm;
• përgatitë projektin e Programit dhe të Statutit të LDK-së, si dhe dokumentet e tjera
• i paraqet raport vjetor për punën e vet Këshillit të Përgjithshëm;
• qeverisë pasurinë e LDK-së dhe për këtë dy herë në vit i paraqet Raport  financiar Këshillit të Përgjithshëm;
• me propozimin e Kryetarit të LDK-së, Kryesia, nga radhët e veta, cakton sekretarët për sektorët e veçantë të veprimtarisë së vet;
• vendosë për dhënien e falenderimeve e të mirënjohjeve për merita e rezultate të punës;
• Kryesia e LDK-së dhe organet e LDK-së për punën e tyre mbajnë procesverbale të rregullta;
•  kryen edhe punë të tjera në pajtim me Programin dhe me Statutin e LDK-së;
•  për punën e vet Kryesia nxjerrë Rregullore të posaçme.

Neni 31

Punën e Kryesisë e drejton Kryetari i LDK-së.

Nënkryetarët ose sekretari i përgjithshëm e zëvendësojnë Kryetarin e LDK-së në rast të mungesës së tij, ose sipas autorizimit.

Kryesia e LDK-së ka edhe zëdhënësin e saj.

 

D. Sekretari i përgjithshëm

Neni 32

Sekretari i përgjithshëm i LDK-së kujdeset për organizimin e punës së Kryesisë dhe për zbatimin e vendimeve të Kuvendit, të Këshillit të Përgjithshëm, të Kryetarit dhe të Kryesisë së LDK-së, si dhe udhëheq administratën.

Neni 33

Kryetari i LDK-së, përkatësisht Kryesia, kanë të drejtë të ndalin realizimin e vendimeve të organeve të LDK-së, të cilat janë në kundërshtim me Ligjin, me Programin dhe me Statutin e LDK-së, si dhe me vendimet e tjera të LDK-së.

Në rastet e tilla janë të detyruar që menjëherë ta njoftojnë Këshillin e Përgjithshëm, për të marrë vendim përfundimtar. 

 

Dh. Komisioni statutar

Neni 34

Komisioni statutar është organ kolegjial dhe i pavarur i LDK-së.

Komisionin statutar e përbëjnë Kryetari, zëvendësi i tij dhe tre anëtarë të tjerë.

Komisionin statutar e zgjedh Kuvendi i LDK-së.

Anëtarët e Këshillit të Përgjithshëm dhe të Kryesisë së LDK-së nuk mund të jenë anëtarë të Komisionit statutar.

Anëtarët e Komisionit statutar nuk mund të jenë as anëtarët e LDK-së që janë të zgjedhur në vendet udhëheqëse, përkatësisht anëtarë të udhëheqësive të degëve të LDK-së, nëndegëve dhe të aktiveve.

Neni 35

Komisioni statutar ka për detyrë që të kujdeset për ligjshmërinë e veprimeve të organeve të LDK-së, si dhe për harmonizimin e aktivitetit të tyre në pajtim me Ligjin dhe me Statutin e LDK-së.

Po që se Komisioni statutar konstaton se organi i LDK-së ka marrë ndonjë vendim i cili është në kundërshtim me aktet e lartshënuara, menjëherë ia tërheqë verejtjen me shkrim atij organi dhe në të njëjtën kohë e njofton organin kompetent të LDK-së, i cili, në bazë të dispozitave të këtij Statuti, pengon realizimin e një vendimi të tillë.

 

E. Degët, nëndegët dhe aktivet e LDK-së

Neni 36

Degët, nëndegët dhe aktivet e LDK-së janë njësi të organizimit dhe të veprimit territorial të LDK-së.

Degët e LDK-së janë njësi të organizimit në nivel të komunës, sipas ndarjes territoriale administrative të Kosovës.

Prishtina ka pesë degë të LDK-së, koordinimin e të cilave e bënë Kolegjiumi i degëve, pa të drejtë të marrjes së vendimeve.

Në bazë të vendimit të Kryesisë së LDK-së, degët e LDK-së formohen edhe në shtete të jashtme.

Koordinimin e veprimit të degëve në Kosovë e bën Kryesia e LDK-së, ndërkaq, në shtetet e jashtme, këtë koordinim e bën përmes kolegjiumit të degëve, i cili përbëhet nga kryetarët e degëve të LDK-së në ato shtete, pa të drejtë të marrjes së vendimeve.

Me kolegjiumin e degëve udhëheq kryetari i kolegjiumit, i cili zgjedhet nga përfaqësuesit e degëve, në bazë të propozimit të Kryesisë së LDK-së.

Për punën e vet dhe organizimin e brendshëm, kolegjiumi i degëve miraton rregullore të posaçme, e cila duhet të jetë në përputhje me Programin dhe Statutin e LDK-së.

Degët e LDK-së në diasporë, krahas respektimit të Programit dhe Statutit të LDK-së, duhet të respektojnë edhe legjislacionin e vendit ku gjenden.

Neni 37

Organet e Degës së LDK-së janë: Kuvendi dhe Kryesia.

Kuvendin e Degës e përbëjnë delegatët e zgjedhur në kuvendet e nëndegëve.

Kuvendi i Degës së LDK-së:

• nxjerrë Programin e punës së Degës;
• shqyrton dhe miraton Raportin e punës së Kryesisë;
• zgjedh Kryesinë, kryetarin, zëvendësin e kryetarit dhe sekretarin e Kryesisë së Degës;
• zgjedh delegatët për Kuvendin e LDK-së;
• merr vendime dhe qëndrime të tjera politike, në pajtim me Programin dhe me Statutin e LDK-së dhe me vendimet e Këshillit të Përgjithshëm dhe të Kryesisë së LDK-së

Neni 38

Kuvendi zgjedhor i Degës mbahet çdo 4(katër) vjet dhe i paraprinë Kuvendit të LDK-së.

Dega mban kuvend pune së paku njëherë në  2(dy) vite.

Kuvendi i Degës konvokohet edhe atëherë kur këtë e kërkojnë 1/3 e delegatëve që e përbëjnë Kuvendin ose 1/3 e kuvendeve të nëndegëve.

Neni 39 

Kryesia e Degës është organ politik ekzekutiv i Kuvendit të Degës dhe përgjigjet për realizimin dhe zbatimin e vendimeve të Kuvendit të Degës, si dhe të organeve më të larta të LDK-së.

Kryesia mund të nxjerrë vendime dhe qëndrime të tjera politike, si dhe vendime tjera që kanë të bëjnë me territorin e Degës në të cilën vepron, në pajtim me Programin dhe me Statutin e LDK-së. Poashtu, Kryesia e Degës bashkërenditë punën e nëndegëve dhe të aktiveve të Degës.

Në raste të veçanta, Kryesia e Degës, në marrëveshje me Kryesinë e LDK-së, mund të marrë vendim për pezullimin e punës së kryesive të nëndegëve, përkatësisht të aktiveve, si dhe ta konvokoj kuvendin e nëndegës, përkatësisht të aktivit.

Neni 40

Numri i anëtarëve të Kryesisë së Degës caktohet në varësi nga numri i anëtarësisë, por jo më shumë se pesëmbëdhjetë.

Kryesia e Degës ka kryetarin, një apo dy zëvëndëskryetarë dhe sekretarin, të cilët zgjedhen sipas procedures që zbatohet edhe për zgjedhjen e organeve të tjera të LDK-së.

Në mbledhjet e Kryesisë së Degës, me të drejta të barabarta, marrin pjesë edhe kryetarja e Forumit të Gruas dhe kryetari i Forumit të Rinisë.

Neni 41

Në bazë të vendimit të Kryesisë së Degës, nëndega e LDK-së formohet në territorin e dy apo më shumë fshatrave, respektivisht lagjeve të qytetit.

Organet e nëndegës së LDK-së janë Kuvendi dhe Kryesia.

Kuvendi i nëndegës zgjedh kryetarin, zëvendësin dhe sekretarin e Kryesisë së nëndegës nga radhët e anëtarëve të Kryesisë, si dhe delegatët për Kuvendin e Degës.

Numri i delegatëve të Kuvendit të nëndegës caktohet varësisht prej numrit të anëtarëve të LDK-së në nëndegë. Në të njëjtën mënyrë caktohet edhe numri i anëtarëve të Kryesisë së nëndegës, por jo më shumë se njëmbëdhjetë.

Neni 42

Për punën e vet Kuvendi i nëndegës paraqet raport dhe i përgjigjet Kuvendit të Degës.

Kryesia e nëndegës, në marrëveshje me Kryesinë e Degës, bën harmonizimin e punës së aktiveve, si dhe kujdeset për zbatimin e vendimeve të organeve më të larta të LDK-së.

Neni 43

Aktivet e LDK-së janë format themelore të organizimit të LDK-së.

Aktivi mund të organizohet edhe në lokalitetet ku ekziston numri i vogël i anëtarëve të LDK-së.

Në aktivet, ku numri i anëtarëve të LDK-së është mbi 100, Kuvendi zgjedhet sipas procedurës mbi zgjedhjet e Kuvendit.

Në aktivet, ku numri i anëtarëve të LDK-së është nën 100, Kuvendin e aktivit e përbëjnë të gjithë anëtarët e LDK-së të atij aktivi.

Neni 44

Kryesia e aktivit, e cila përbëhet prej më së shumti nëntë anëtarëve, ka Kryetarin, zëvendësin dhe sekretarin, i cili zgjedhet nga ana e Kuvendit të Aktivit.

Organet e aktivit të LDK-së aktivitetin e vet e zhvillojnë në bashkërenditje me organet e nëndegës, përkatësisht të Degës së LDK-së dhe janë përgjegjëse para tyre.

Neni 45

Kuvendi i Degës, i Nëndegës dhe i Aktivit konvokohen dhe i aplikojnë në mënyrë identike dispozitat e këtij Statuti, që kanë të bëjnë me punën dhe me veprimtarinë e Kuvendit të LDK-së.

Neni 46

Zgjedhja e delegatëve për Kuvendin e nëndegës dhe për Kuvendin e degës bëhet nga radhët e delegatëve, përkatësisht anëtarëve të Kuvendit të aktivit, përkatësisht të nëndegës dhe nga anëtarësia e gjerë e LDK-së, të cilët e kanë vendbanimin e përhershëm në territorin e aktivit, përkatësisht të nëndegës.

Kuvendi i degës së LDK-së zgjedh delegatët për Kuvendin e LDK-së nga përbërja e vet, si dhe nga anëtarësia e gjerë e territorit të degës dhe jashtë saj.

Kuvendi i Degës së LDK-së nuk mund të zgjedh për delegat në Kuvendin e LDK-së anëtarin e LDK-së, i cili ka hyrë më parë në procesin zgjedhor në ndonjë kuvend të ndonjë dege tjetër të LDK-së, pa marrë parasysh rezultatin e votimit për të.

Neni 47

Me rastin e propozimit të secilit kandidat për t’u zgjedhur në organet e LDK-së është e nevojshme të dihet deklarimi i tij paraprak për pranimin e kandidaturës.

Deklarimi për pranimin e kandidaturës bëhet me gojë ose me shkrim.

Në rastet kur kandidati i propozuar nuk deklarohet për kandidaturën, nënkuptohet si pranim i saj në heshtje.