Lidhja Demokratike e Kosovës  Dega IV Prishtinë

 

 Statuti i Lidhjes Demokratike të Kosovës

 

                       I. DISPOZITAT E PËRGJITHSHME

Neni 1

Lidhja Demokratike e Kosovës (në tekstin e mëtejm: LDK) është Parti Politike e qytetarëve të lirë, e cila aktivitetin e vet politik e zhvillon në bazë të Programit, të Statutit dhe të dokumenteve të tjera të miratuara në Kuvend.

Neni 2

LDK-ja vepron në mënyrë të pavarur në tërë territorin e Kosovës.

LDK-ja organizohet dhe vepron edhe jashtë Kosovës, në përputhshmëri me ligjet e shtetit përkatës.

Selia e LDK-së është në Prishtinë.

Neni 3

LDK-në e përfaqëson Kryetari i LDK-së.

Në mungesë të Kryetarit, LDK-në e përfaqësojnë nënkryetarët, sekretari i përgjithshëm, përkatësisht anëtarët e autorizuar të Kryesisë.

 LDK-në mund ta përfaqësojnë edhe anëtarët e tjerë të LDK-së, në bazë të autorizimit të Kryetarit, të Kryesisë apo të Këshillit të Përgjithshëm.

Neni 4

LDK-ja ka vulën, akronimin, logon dhe flamurin e saj.

Formën dhe përmbajtjen e vulës, akronimit, logos dhe flamurit të LDK-së e përcakton Këshilli i Përgjithshëm me propozimin e Kryesisë.

Vulë kanë edhe degët e LDK-së, forma dhe përmbajtja e të cilave, përpos selisë së Degës, duhet të jetë identike me vulën e LDK-së Qendrore.

Ruajtja dhe përdorimi i vulës rregullohet me vendim të veçantë të Kryesisë.