Lidhja Demokratike e Kosovës  Dega IV Prishtinë

 

Programi i Lidhjes Demokratike të Kosovës

 

 

Lidhja Demokratike e Kosovës, si lëvizje demokratike kombëtare, mbështetet në traditën e përpjekjeve të shqiptarëve për vetëqeverim dhe liri të Kosovës. Menjëherë pas formimit të saj në dhjetor të vitit 1989, nga një grup intelektualësh në krye me dr. Ibrahim Rugovën, mori në gjiun e vet njerëz të shtresave të ndryshme që mbështesin vlerat morale diturore e qytetëruese të shqiptarëve të ndërgjegjshëm se liria dhe pavarësia janë parakushte të ekzistencës kolektive. Ajo u bë integruese dhe harmonizuese e energjive të kombit, që shpien në një bashkim mendor e shpirtëror, për të mbrojtur të drejtat e popullit shqiptar pa prekur të drejtat e të tjerëve.

Duke u bërë artikuluese e vullnetit për pavarësi të Kosovës, LDK u bë promotorja e demokracisë dhe kundërshtarja e madhe e totalitarizmit, duke bërë një përqëndrim politik e një organizim të gjithanshëm, ku konkurrenca e ideve ka vlerë e kuptim deri në nivelin e marrëveshjes dhe atëherë merr formën e veprimit të pahamendje. Si forca më e madhe bashkuese politike e shqiptarëve ajo iu priu veprimeve politike shtetformuese të Kosovës.

Lidhja Demokratike e Kosovës, drejt qëllimit madhor historik - pavarësisë së Kosovës, kërkoi harmonizimin e energjive të brendshme të shqiptarëve dhe ndihmën e miqve të jashtëm që njohin të drejtat e kombeve për vetëvendosje. Si artikuluese autentike e vullnetit politik të shqiptarëve të Kosovës, kjo lidhje këtë vullnet e ngriti në vullnet institucional: me organizimin e shpalljes së Deklaratës Kushtetuese 1990, nxjerrjes së Kushtetutës së Kaçanikut 1990, organizimit të Referendumit për Pavaërsinë e Kosovës 1991 dhe Zgjedhjet parlamentare e presidenciale të Republikës së Kosovës 1992 e 1998. Në të dy zgjedhjet Lidhja Demokratike e Kosovës e ka fituar shumicën absolute në Parlamentin e Republikës së Kosovës dhe dr.Ibrahim Rugova është zgjedhur kryetar i Kosovës.

Lidhja Demokratike e Kosovës e fitoi, gjithashtu, shumicën e vendeve edhe në zgjedhjet e vitit 2000 për pushtetin lokal dhe në ato të vitit 2001 për pushtetin qendror, respektivisht, të organeve për vetëqeverisje të përkohëshme, të organizuara nga OSBE-ja.

Lidhja Demokratike e Kosovës vullnetin politik për pavasi të institucionalizuar e bëri të njohur në botën perëndimore, në Evropë e në Amerikë, nëpërmjet përfaqësuesve të saj, në mënyrë të veçantë të kryetarit, dr.Ibrahim Rugova, duke bërë thirrje për mirëkuptim dhe ndihmë dhe duke shpjeguar se zgjidhja politike e çështjes së Kosovës me pavarësinë e saj është një domosdo për zhvillimin e lirë të qytetarëve të saj dhe një akt i qetësisë politike të rajonit.

Duke vënë tolerancën dhe dialogun përpara dhunës, LDK gati një decenie bëri përpjekje që çështja e Kosovës të zgjidhet me mjete politike e demokratike, duke kundërshtuar politikën agresive dhe shtypëse të Beogradit. Ajo orgnaizoi një rezistencë të fuqishme të gjithë popullsisë të mbështetur në marrëveshje, ndihmë, solidaritet dhe duke organizuar jetën sociale dhe institucionale shqiptare kundruall pushtetit represiv të Beogradit.

Në vitet 1998 e 1999, kur shtypja serbe në Kosovë mori përmasat e gjenocidit mbi shqiptarët, pas një rezistence politike disavjeçare të LDK-së dhe popullit të Kosovës, kjo lëvizje përkrahu, ndihmoi dhe mori pjesë në rezistencën e armatosur kundër agresionit të Beogradit. Si kurorë e kësaj rezistence të organizuar të shqiptarëve dhe si intervenim ushtarak i forcave ndërkombëtare kundër Serbisë, në qershorin e vitit 1999, ushtria dhe paramilitarët serbë kapituluan në Kosovë, duke u tërhequr prej saj dhe duke ia dhënë shansin Kosovës që të vendosë për fatin e vet.

Lidhja Demokratike e Kosovës gjatë veprimit të saj politik e kombëtar gjithmonë ka vlerësuar që pavarësimi i Kosovës, si çështje ekzistenciale për shqiptarët, është çështje e madhe politike edhe për rajonin dhe nuk mund të zgjidhet pa ndihmën ndërkombëtare, në rend të parë të SHBA-ve dhe Bashkimit Evropian. Tani që kjo ndihmë është bërë vepër, LDK-ja bashkëpunon ngushtë me mbrojtësit dhe administratorët ndërkombëtarë për ta rindërtuar Kosovën në fazën kalimtare drejt qëllimit përfundimtar të lirisë, të pavarësisë dhe të demokracisë së saj.

Lidhja Demokratike e Kosovës këtë Program e ka vënë në zbatim në zgjedhjet për pushtetin lokal të organizuara në vitin 2000, si dhe në ato nacionale për pushtetin qendror, respektivisht, për organet e vetëqeverisjës së përkohshme në Kosovë, të orgnizuara në vitin 2001.

 

                                 Parimet e Programit
         
     1.

Lidhja Demokratike e Kosovës është parti e qendrës, që mbështetet në kulturë e jo në ideologji, që ka instrument të punës përgjegjësinë e jo detyrimin. Në gjirin e saj kultivohet dialogu dhe konkurrenca e ideve për vlerat deri në nivelin e formimit të qëndrimeve, që bëhen të patjetërsueshme dhe të obligueshme për veprim. Në këtë mënyrë ruhet demokracia e brendshme e zhvillimit të saj dhe njësia e saj politike për qëllimet kryesore.

2.

Lidhja Demokratike e Kosovës është parti e traditës dhe bashkëkohësisë. Ajo ruan e kultivon vlerat njerëzore vendëse të bazuara në humanitet, solidaritet, tolerancë e ndershmëri, që do të thotë se është organizatë e besnikërisë. Poashtu, synon ringjalljen kombëtare dhe transformimin e vlerave shoqërore, morale e politike në rrafshin e bashkëkohësisë, në epokën e komunikimit të gjithanshëm të vlerave.

3.

Lidhja Demokratike e Kosovës synon dhe punon për Kosovën si shtet të pavarur e demokratik, duke e njohur këtë zgjidhje politike në pajtim me vullnetin e qytetarëve të Kosovës dhe si zgjidhje politike që do ta stabilizojë rajonin e Evropën juglindore e botën shqiptare në këtë rajon. Ajo mendon se zgjidhja politike, ashtu edhe sistemi shoqëror, mund të jenë të pranueshëm vetëm në bazë të vullnetit politik të shqiptarëve, i cili mund të provohet edhe njëherë në referendum nën mbikëqyrjen ndërkombëtare.

4.

Lidhja Demokratike e Kosovës ka synim ndërtimin e një shoqërie pluraliste, në të cilën do të zhvillohet konkurrenca lojale e programeve, vlera e të cilave provohet nëpërmjet zgjedhjeve të lira. Zgjedhjet e lira e demokratike nxjerrin përfaqësues njerëzit që marrin përgjegjësitë për qeverisjen e Kosovës. Çfarëdo kompromisi i bërë pa zgjedhje nuk mund të japë përfaqësues të qytetarëve të Kosovës që do ta udhëheqnin vendin kah zhvillimi dhe përparimi. Vetëm përfaqësuesit autentikë e ngrisin shtetin ligjor me një ndarje të pushtetit në pjesën legjislative, ekzekutive dhe në gjyqësinë e pavarur.

5.

Lidhja Demokratike e Kosovës synon Kosovën e pavarur e demokratike, e cila do t’i njohë standardet ndërkombëtare, ta shpjerë kah inkuadrimi në NATO, në Bashkimin Evropian dhe në organizimet e tjera ndërkombëtare, duke krijuar marrëdhënie të hapura me fqinjët për interesin e përbashkët.

6.

Lidhja Demokratike e Kosovës bashkëpunon me të gjitha partitë që synojnë pavarësinë e Kosovës në botën shqiptare, si dhe me të gjitha partitë demokratike në Evropë e në Amerikë që njohin të drejtën e popujve për vetëvendosje. Bashkëpunon me faktorët politikë dhe ushtarakë ndërkombëtarë në Kosovë gjatë kohës së tranzicionit dhe punon për rindërtimin politik, ekonomik, social e kulturor të Kosovës të shkatërruar nga lufta.

7.

Lidhja Demokratike e Kosovës, me një anëtarësi të shtresave dhe të moshave të ndryshme, e ka një shtrirje organizative në gjithë territorin e Kosovës dhe në diasporën shqiptare në Evropë e në Amerikë. Në strukturën e saj ka Forumin e Gruas, që organizon femrat dhe merret me afirmimin e tyre në shoqëri. Brenda strukturës së saj ka edhe forumin e Rinisë, që merret me interesat e brezit i cili hyn në jetën shoqërore e politike të vendit, si brez i së tashmes dhe i së ardhmes. Të dyja këto forume i kanë programet e veta të veprimit në kuadrin e Lidhjes Demokratike të Kosovës.

8.

Lidhja Demokratike e Kosovës respekton dhe mbron parimet demokratike, përkrah dhe mbron të drejtave të njeriut, angazhohet për respektim, tolerancë dhe mirëkuptim ndaj të gjithëve, pa marrë parasysh përkatësinë e tyre etnike, duke ditur që nuk mund të ketë shoqëri të lirë në Kosovë pa garantimin e lirisë së individit. Individi duhet të ketë lirinë e mendimit, të shprehjes e të veprimit për të realizuar interesat, synimet e vlerat e veta, të cilat më në fund janë vlera të gjithë shoqërisë.

9.

Lidhja Demokratike e Kosovës angazhohet për zhvillimin e ekonomisë së tregut dhe të inisiativës së lirë, duke pasur kujdes për shfrytëzimin e arsyeshëm të pasurive e të burimeve natyrore të vendit; për qarkullim të lirë të mallit e të kapitalit në vendet e zhvilluara. Në të njëjtën kohë kërkon të vërë në jetë një politikë sociale që përkujdeset për burimet jetësore të të gjitha shtresave të shoqërisë.

10.

Lidhja Demokratike e Kosovës kërkon arsimimin kombëtar në gjuhën amtare në të gjitha nivelet e shkollimit. Përkrahë programet që japin dije për autenticitetin dhe identitetin kombëtar, si dhe programet që japin dije bashkëkohore nga të gjitha fushat. Angazhohet për kultivimin e veprimeve krijuese në të gjitha fushat, duke synuar një kulturë autentike e cila e krijon dhe e forcon identitetin e kulturës shqipe në gjirin e familjes së kulturave të tjera. Angazhohet për ndihmesë të veçantë të institucioneve dhe të programeve krijuese me rëndësi të veçantë kombëtare.

11.

Lidhja Demokratike e Kosovës angzahohet që të gjithë qytetarët e Kosovës të kenë sigurim të plotë mjekësor.

12.

Lidhja Demokratike e Kosovës synon mbrojtjen dhe rregullimin e ambientit, i cili në gjendjen e tashme është bërë i rrezikshëm për jetën e njeriut.