Lidhja Demokratike e Kosovës  Dega IV Prishtinë

Vendimi për pavarësinë - në kohën e duhur, thotë kryeparlamentari Berisha

Prishtinë, 7 korrik 2007 - Kryeparlamentari Kolë Berisha, i siguroi sot qytetarët e Kosovës se institucionet vendore, në kohën më të përshtatshme dhe në momentin e duhur, bashkërisht edhe me miqtë ndërkombëtarë, do të kryejnë detyrën dhe obligimin që kanë ndaj popullit, duke e bërë pavarësinë e Kosovës. Këto komente, Berisha i bëri sot në Kuvendin VII zgjedhor të Forumit të Rinisë të LDK-së.

Në praninë e shumë përfaqësuesve të rinisë nga LDK-ja Reformiste Ora, Partive nga Maqedonia si BDI-ja dhe PDSh-ja kuvendi i Forumit të Rinisë të LDK-së, i zhvilloi punimet për drejtuesit e rinj të forumit. Me këtë rast, rinisë partiake iu drejtua kryetari i kuvendit të Kosovës Kolë Berisha. Berisha premtoi për angazhim të mëtutjeshëm në procesin për pavarësinë e Kosovës.
“Duke iu falënderuar presidentit tonë, dhe miqve tonë, ne do ta fitojmë edhe këtë luftë por tani jo me pushke por me dije, me politikë dhe diplomaci ne mënyrë që t’i kthejmë Kosovës imazhin që kishte dikur para botës”, tha Berisha.
Ndërkaq nënkryetari i LDK-së, Eqrem Kryeziu, me dozë humori u tha delegatëve të rinj se rinia do të jetë bartëse e proceseve dhe ndryshimeve historike.“Secili nga ju duhet të ketë ëndrrën e tij dhe po ashtu si forum duhet të keni ëndrrën tuaj, të ndërtuar me punë sepse vetëm kështu do të mund t’i ndihmojmë LDK-së dhe Kosovës”, tha ai.
Kuvendi i Forumit të Rinisë së LDK-së, në vazhdim të punimeve të saj me shumicë dërmuese votash aprovoi Rregulloren Organizative të forumit, Raportin e Punës në mes dy kuvendeve si dhe me aklamacion për kryetare në mandatin dyvjeçar zgjodhi zonjushën Sytrime Dërvisholi dhe Këshillin e Përgjithshëm të forumit prej 73 + 2 anëtarëve.