Lidhja Demokratike e Kosovës  Dega IV Prishtinë

Palestra e sporteve "1 Tetori" ishte e vogël për t'i zënë të gjithë simpatizantët e LDK së të cilët kishin ardhur për ta hapur zyrtarisht fitoren e kësaj partie, e cila për herë të parë hyn në këtë garë zgjedhore pa themeluesin dhe arkitektin e pavarësisë së Kosovës, Presidentin historik të Kosovës, Dr. Ibrahim Rugova. Simpatizantë të shumtë mbanin në dorë tre lloj famujsh: atë kombëtar, të Dardanisë dhe të LDK-së, të cilët u uronin mirëseardhje pjesëmarrësve. Të pranishmit thanë se "do të nisemi sot nga kjo sallë si shumë herë të tjera për një fitore të re". "LDK e Ibrahim Rugovës që nga themelimi di vetëm për fitoren. Puna, respekti dhe përgjegjësia gjithmonë na janë shpërblyer me besimin e qytetarëve të Kosovës. Edhe tash do të jetë kështu. Fitore do të jetë emri ynë", thanë ata. Presidenti i Kosovës, Fatmir Sejdiu, tha në këtë tubim madhështor të LDK-së tha se është nder i veçantë që gjendet bashkë me pjesëmarrësit e shumtë në "këtë moment të rëndësishëm të ecjes sonë të suksesshme që ka të bëjë me përmbylljen e një pune të madhe dhe të jashtëzakonshme që ka bërë LDK dhe Kosova nën udhëheqjen e liderit të saj shpirtëror, Presidentit historik të saj, Dr. Ibrahim Rugova". "Është kjo fushatë pa prezencën e parë fizike të tij, por me trashëgiminë e tij të fuqishme. Është kjo fushatë me emrin e tij, me personalitetin që i dha aq shumë Kosovës, me njeriun dhe arkitektin e shtetit sovran dhe modern të Kosovës, me njeriun e tolerancës, dijes dhe me njeriun e kërkimit të dijes dhe kërkimit të kulturës politike dhe të mendimit politik, me njeriun që lidh Kosovën me botën dhe me njeriun që na solli në këtë fazë ku jemi tani", tha Presidenti Sejdiu, derisa shumë herë ndërpritej nga brohoritjet, "Rugova, Rugova - Fatmir Sejdiu, Fatmir Sejdiu - LDK, LDK". Presidenti në vijim të fjalimit të tij tha se edhe në këto momente të rëndësishme që jeton Kosova, janë momente të konkurrencës dinjitoze, tolerancës, respektimit të vlerave, dinjitetit dhe botës së lirë qytetare dhe ata të vendosin t'i zgjedhin më të mirët dhe besoj se do të dinë. "Është me rëndësi të veçantë që në këto momente që po jeton Kosova të bëjmë punën më të madhe të mundshme, duke shkrirë gjithë dijen tonë, energjinë që të kapërcejmë edhe këto ditë punë të përfundimit të statusit të saj politik të mbështetjes ndërkombëtare të Kosovës dhe njohjes së saj ndërkombëtare dhe siç e thoshte Presidenti Rugova të pavarësisë së popullit të saj", vlerësoi Presidenti Sejdiu. Ai tha se në këtë periudhë përmbyllëse, me punën tonë të madhe dhe me ndihmën e madhe të aleatëve tanë, po hyjmë me projektin që Kosova denjësisht ta prezantojë me vlera të reja dhe që Kosova të ecë me projektet e reja që do të jenë realizimet e interesave të qytetarëve, siç janë integrimet euroatlantike, mbështetja e saj e fuqishme nga ata që kanë qenë dhe që i ka lidhë Presidenti Rugova. "Është me rëndësi se kemi detyra të shumta para nesh. Kemi ato që i kujtojmë nga vizioni politik i Presidentit Rugova për të ndërtuar dhe për ta kthyer identitetin e Evropës edhe në rrugët e vjetra të antikës, lashtësisë ilire, në rrugën e Rugovës që do të përfundojë edhe andej edhe këndej kufirit me Shqipërinë", tha Sejdiu. Presidenti Sejdiu tha se "e rëndësishme është në këtë epokë të hyjmë se bashku duke bërë reforma të atilla që japin përgjigje në dinamikën e zhvillimeve, reforma që bëjnë kthesën e veçantë në qeverisjen edhe më të mirë" dhe se vendi ynë ka potencial për të barë këtë. "Është shumë e veçantë në projektet që kemi që te ecet në një reformë të mirëfilltë, në dinjitetin e plotë të shëndetësisë dhe arsimit dhe në gjetjen e një reforme të veçantë të ristrukturimit të tyre, pa e lënë anash funksionimin e sistemeve të tjera mbi bazë të pushteteve të ndara dhe qeverisjes së mirë dhe mbi bazë të shtetit ligjor", tha në fund të fjalës së tij Presidenti Sejdiu, i përcjellë me duartrokitje të gjata frenetike. Duke marrë fjalën, nënkryetari i parë i Lidhjes Demokratike të Kosovës, Eqrem Kryeziu, përkujtoi në fillim se Presidenti Sejdiu ka qenë njëri ndër bashkëpunëtorët më të dobishëm të Presidentit Rugova, duke falënderuar simpatizantët e LDK-së për pjesëmarrje në këtë "spektakël". "Është e vërtetë se ne që kemi mbetur gjallë, kemi përjetuar shumë peripeci. Mirëpo çfarëdo që kemi përjetuar është vështirë që të gjejmë fjalët e përshtatshme në këtë atmosferë të ngrohtësisë, shpresës dhe të besimit. Ky është një spektakël që do të merret si lajm i mirë, lajm i gëzuar për Kosovën edhe më tutje se sot LDK-ja e vë veten në dispozicion për të drejtuar institucionet e Kosovës të cilat do ta kenë bekimin e popullit të Kosovës", tha nënkryetari Kryeziu. Ai tha se janë bërë aplikacionet dhe formalizmat e tjera, por sipas tij, kjo është dëshmia për gjithë njerëzit, madje edhe për ata që nuk janë në LDK, sepse e dinë që LDK-ja është rruga e cila shpie në numrin 89. Nënkryetari i LDK-së vuri në dukje se problemin më të madh LDK-ja e ka pasur në përzgjedhjen e sloganit, për të cilin ka pasur mendime të ndryshme. "LDK-ja është e vërteta dhe është fakt se ajo është e vërteta, unikja, kush e donë Kosovën e donë edhe LDK-në, LDK-ja është dashuria dhe shpresa jonë, LDK-ja dhe mundësia e zhvillimit të Kosovës", tha Kryeziu. Duke shpalosur disa nga pikat kryesore të Programit të LDK-së për zgjedhjet e nëntorit, Eqrem Kryeziu tha se ky program bazohet në programin të cilin për së gjalli e bëri ish Presidenti Rugova. "Në këtë program janë disa pika kyçe si ekonomia, arsimi, shëndetësia dhe është fondi i domosdoshëm që është pavarësia do ta trasojmë rrugën e Presidentit Ibrahim Rugova, duke e parë kujdesin e SHBA-ve ne duhet të jemi mirënjohës dhe këtu në këtë platformë janë edhe pikat e qeverisë së ardhshme që do të qeveriset nga LDK-ja. Platforma mban edhe pikat kyçe të shoqërisë kosovare në të cilat kemi vërejtur mangësi dhe ne premtojmë se do t’i përmirësojmë", vlerësoi në fjalën e tij, nënkryetari i parë i LDK-së, Eqrem Kryeziu. Në vazhdim, u bë edhe prezantimi i kandidatëve për deputetë në Kuvendin e Kosovës dhe u shfaq një program artistik.