Lidhja Demokratike e Kosovës  Dega IV Prishtinë

Dr. Mustafa: Do të angazhohem për ndalimin e degradimit urban të Prishtinës

Kandidati i Lidhjes Demokratike të Kosovës (LDK), për kryetar të Prishtinës, Dr. Isa Mustafa, tha sot se prioritetet e tij afatshkurtra në krye të Komunës së Prishtinës do të jenë ndalja e degradimit urban të qytetit, hapja e rrugëve unazore, zhvillimi i rrjetit të brendshëm të rrugëve dhe normalizimi i komunikacionit, zbatimi i planeve rregulluese, lehtësimi i kushteve dhe procedurave të dhënies së lejeve të ndërtimit dhe përmirësimi i nivelit të cilësisë dhe shërbimeve të qytetarëve. Dr. Isa Mustafa gjatë një konference me gazetarë, ku zyrtarisht hapi edhe fushatën zgjedhore për kryetar të Prishtinës me moton: "Një identitet të ri për kryeqytetin tonë", tha se prioritet afatgjate të tij për Prishtinën janë: Kombinimi i zhvillimit ekonomik dhe urban të komunës, zhvillimi harmonik ekonomik dhe hapësinor, regjenerimi i ambientit, rritja e hapësirave publike, sidomos sipërfaqeve të gjelbëruara, objekteve rekreative dhe objekteve tjera për rini, fëmijë dhe të moshuar, zgjidhja afatgjate e problemit të ujit për Prishtinën me rrethinën, si dhe ndërtimi i Prishtinës së re. Mustafa tha se kryeqyteti i Kosovës me një zhvillimin ekonomik, me urbanizëm bashkëkohor dhe shërbime efikase cilësore, qendër e jetës së begatshme kulturore, arsimore e sportive, i integruar në zhvillimet rajonale e ndërkombëtare, me shërbime të fuqishme intelektuale e financiare, do të jetë një shtëpi e rehatshme dhe cilësore për qytetarët. Dr. Mustafa tha se me fitimin e besimit të elektoratit për ta drejtuar kryeqendrën e Kosovës, Prishtina do ta fitoj një identitet të ri urbanistik. Përpos ndërtimit të unazës së qytetit, Mustafa tha se angazhohet edhe për ndërtimin e garazheve publike me koncesion, të cilat do t'u mundësojnë qytetarëve qarkullim më të lirë nëpër rrugë. Ai ka vlerësuar si të fortë garën e kandidatëve për Komunën e Prishtinës, mirëpo, ai është shprehur i bindur se do ta fitoj këtë garë. Duke u përgjigjur në interesimin e gazetarëve se si ai si kryetar i ardhshëm i Prishtinës do ta përmirësoj administratën e Komunës së Prishtinës, për të cilët qytetarët kanë vërejtje të shumta, Mustafa tha se do ta përmirësoj sportelin për qytetarë, në të cilin qytetarët do të mund t?i kryejnë të gjitha shërbimet. Ai tha se angazhohet edhe për caktimin e një “orari rrëshqitës”, ku të gjithë nëpunësit e Komunës nuk do të jenë të detyruar që me një kohë të caktuar t'ia fillojnë orarit të punës, por disa nëpunës to t'ia fillojnë punës më herët, e disa më vonë, në mënyrë që qytetarët edhe pas orës 5 pasdite t’i kryejnë shërbimet e nevojshme në Komunë. Këto premtime, sipas z. Mustafa, janë të realizueshme e jo vetëm fjalë. "Pas dy vjetëve do të jap përgjegjësi para qytetarëve, nëse nuk do t'i realizoj të gjitha këto premtime", tha Mustafa.